കുവൈറ്റിൽ ഹിജ്റ പുതുവത്സര അവധി പ്രഖ്യാപിച്ചു. ദുൽ ഹജ്ജ് മാസത്തിന്റെ ദൈർഘ്യം അനുസരിച്ചായിരിക്കും അവധിയുടെ തീയതി അന്തിമമായി തീരുമാനിക്കുക എന്ന് മന്ത്രിസഭ അറിയിച്ചു. മാസം 29 ദിവസമാണെങ്കിൽ ജൂൺ 16 ചൊവ്വാഴ്ച സർക്കാർ അവധിയായിരിക്കും. ജൂൺ 17 മുതൽ സാധാരണ പ്രവർത്തനം പുനരാരംഭിക്കും.
അതിനിടെ, ദുൽഹജ്ജ് മാസം 30 ദിവസമാണെങ്കിൽ ജൂൺ 17, 18 തീയതികളിൽ രണ്ട് ദിവസം തുടർച്ചയായി അവധി ലഭിക്കും. തുടർന്ന് വാരാന്ത്യ അവധികൾക്ക് ശേഷം ജൂൺ 21 മുതൽ സർക്കാർ ഓഫീസുകൾ വീണ്ടും പ്രവർത്തനം ആരംഭിക്കും. ചന്ദ്രദർശനത്തിന് ശേഷം മാത്രമായിരിക്കും അന്തിമ അവധി തീയതി സ്ഥിരീകരിക്കുക.
നേരത്തെ യുഎഇയിലും ഒമാനിലും പൊതു-സ്വകാര്യ മേഖലകളിലെ ജീവനക്കാർക്ക് ഹിജ്റ പുതുവർഷത്തോടനുബന്ധിച്ചുള്ള പൊതു അവധി പ്രഖ്യാപിച്ചിരുന്നു. യുഎഇയിൽ ജൂൺ 15 തിങ്കളാഴ്ച അവധി പ്രഖ്യാപിച്ചപ്പോൾ ഒമാനിൽ ജൂൺ 18 വ്യാഴാഴ്ചയാണ് ഔദ്യോഗിക അവധി. ശനി, ഞായർ ദിവസങ്ങളിൽ വാരാന്ത്യ അവധിയുള്ള ജീവനക്കാർക്ക് തിങ്കളാഴ്ച കൂടി ചേരുന്നതോടെ തുടർച്ചയായ മൂന്ന് ദിവസത്തെ ലീവ് യുഎഇ നിവാസികൾക്ക് ആസ്വദിക്കാം. നിലവിൽ വെള്ളി മുതൽ ഞായർ വരെ അവധിയുള്ള ഷാർജയിലെ സർക്കാർ ജീവനക്കാർക്ക് പുതിയ പ്രഖ്യാപനത്തോടെ 4 ദിവസത്തെ നീണ്ട ഇടവേളയാണ് ലഭിക്കുക. ജൂൺ 16 ചൊവ്വാഴ്ച മുതൽ യുഎഇയിൽ പതിവ് പ്രവൃത്തിദിനങ്ങൾ പുനരാരംഭിക്കും.
ഒമാനിലെ തൊഴിൽ മന്ത്രാലയത്തിന്റെ വാർഷിക കലണ്ടർ അനുസരിച്ച് പൊതുമേഖലാ ജീവനക്കാർക്ക് ജൂൺ 18 വ്യാഴാഴ്ചയാണ് ഹിജ്റ പുതുവത്സര അവധി പ്രഖ്യാപിച്ചിരിക്കുന്നത്. തുടർന്ന് വരുന്ന വെള്ളി, ശനി ദിവസങ്ങളിലെ ഔദ്യോഗിക വാരാന്ത്യ അവധി കൂടി ചേരുന്നതോടെ സുൽത്താനേറ്റിലെ ജീവനക്കാർക്കും തുടർച്ചയായ മൂന്ന് ദിവസത്തെ വിപുലീകൃത അവധി ലഭിക്കും.
Content Highlights: Kuwait has declared a public holiday for the Hijri New Year, resulting in a four-day break. The extended holiday period is expected to encourage celebrations and domestic travel.